OpenAI kompaniýasy ChatGPT-niň Advanced Voice Mode funksiýasyny, ýagny häzirki wagtda sesli gepleşik edip bolýan aýratynlygyny täzeledi. Täzelenmeden soň, emeli aň kömekçisi has ýakymly söhbetdeş boldy. Ol indi söhbetdeşlik gidip durka ulanyjylaryň sözüni ýygy-ýygydan bölmeýär diýip, «TechCrunch» neşiri habar berýär.
OpenAI bu täzelenme bilen köp sanly sesli kömekçilerde bar bolan umumy meseläni çözmäge synanyşdy. Emeli aň kömekçileri ulanyjylar pikirlenmek ýa-da dem almak üçin gürlemegi bes edenlerinde, köplenç olaryň sözüni bölýär. Täze Advanced Voice Mode bu meseläni düzetdi. Indi ChatGPT söhbetdeşlik wagty ulanyjylara gysga wagtlaýyn dymmaga mümkinçilik berýär we olaryň sözüni kesmeýär.
Bu täze aýratynlyk mugt ChatGPT ulanyjylary üçin hem elýeterli. Tölegli wersiýalaryň ulanyjylaryna bolsa has kämilleşdirilen sesli kömekçi hödürlenýär. ChatGPT Plus, Teams, Edu, Business we Pro ýaly nyrhnamalaryň abunalaryna has şahsylaşdyrylan kömekçi bilen işleşmäge mümkinçilik berilýär. OpenAI kompaniýasynyň berýän maglumatlaryna görä, sesli kömekçiniň berýän jogaplary indi «has gönümel, has gyzykly, gysgaldylan, has anyk we döredijilikli» boldy.
OpenAI emeli aň babatynda dünýäniň öňdebaryjy kompaniýasy hasaplanýar. Emma bu ýagdaýy gorap saklamak üçin kompaniýa barha köp tagalla etmeli bolýar. Kompaniýa bäsdeşlerinden ozdurmak üçin täze tehnologiýalary döretmäge we öňden bar bolanlary gowulandyrmaga dowam edýär.
