Awstraliýanyň «Qantas» awiakompaniýasy 2027-nji ýylyň başynda Sidneý — London we Sidneý — Nýu-Ýork ugurlary boýunça arakesmesiz howa gatnawlaryny ýola goýar. Bu uçuşlar dünýädäki iň uzak aralyklara dowamly amala aşyrylýan täjirçilik gatnawlary bolar we azyndan 19 sagat dowam eder. Bu barada awiakompaniýanyň baş direktory Wanessa Hadson «Financial Times» neşirine beren interwýusynda mälim etdi.
Häzirki wagtda dünýäniň iň uzak aralygyna howa gatnawy «Singapore Airlines» awiakompaniýasy tarapyndan ýerine ýetirilýär. Ol Nýu-Ýork — Singapur ugry boýunça gatnawlary amala aşyrýar. Bu uçuşlar 18 sagat 40 minut dowam edýär, geçilýän aralyk bolsa – 13 müň 320 km. Awstraliýanyň «Qantas» awiakompaniýasy hem, aslynda, iň uzak aralyklara uçuşlary amala aşyrýanlaryň ilkinji üçlügine girýär. Häzirki wagtda awiakompaniýa London — Pert ugry boýunça gatnawlary amala aşyrýar. Bu uçuşlar bolsa, 16 sagat 30 minut dowam edip, 12 müň 600 km ýol geçilýär.
Wanessa Hadson beýle uzak aralyga howa gatnawynyň näme üçin ýola goýulýandygyny düşündirdi. Onuň aýtmagyna görä, «Qantas» awiakompaniýasy 2018-nji ýylda London — Pert ugry boýunça howa gatnawlaryny açanda, bu ugra ýolagçylaryň islegi örän ýokary bolupdyr. Şeýlelikde, awiakompaniýa Sidneý bilen Londonyň arasynda-da şeýle uzak uçuşlary ýola goýmagyň maksadalaýykdygyna göz ýetiripdir.
Täze howa gatnawlary üçin «Airbus 350-1000» kysymly uçarlar ulanylar. Bu uçarlaryň ilkinji tapgyry awiakompaniýa şu ýylyň ahyrynda gowşurylar. Aslynda «Qantas» bu uçarlary 2022-nji ýylda sargyt edipdir we Londona uçuşlary 2025-nji ýylda başlatmagy meýilleşdiripdir. Emma düzgünleşdiriji edaralar uçarlary öndürýän «Airbus» korporasiýasyna uzak uçuşlar üçin niýetlenen goşmaça ýangyç baklaryna käbir üýtgetmeleri girizmegi tabşyransoň, meýilnamalar biraz gijä galypdyr.
