ProMotion displeý tehnologiýasy indi diňe bir Pro modellerde däl-de, eýsem adaty iPhone modelinde hem peýda bolar diýip, «Bloomberg» neşiriniň žurnalisti Mark Gurman habar berýär.
ProMotion – 10 Gs-den 120 Gs-e çenli aralykda işleýän täzeleniş ýygylygyna eýe displeý tehnologiýasydyr. Ol ilkinji gezek 2017-nji ýylda iPad Pro-da peýda bolupdy, soňra bolsa 2021-nji ýylda iPhone 13 Pro modeline ornaşdyryldy.
Bu tehnologiýanyň esasy aýratynlygy nämede? Ol animasiýanyň bar ýerinde displeýiň täzeleniş tizligini ýokarlandyrýar, statiki şekillerde bolsa peseldýär. Şeýlelikde, energiýanyň sarp edilişi bilen öndürijiligiň arasyndaky deňagramlylyk saklanylýar.
«Bloomberg» neşiriniň çeşmelerine görä, ProMotion tehnologiýasy diňe iPhone 17 Pro we Pro Max modellerinde däl-de, eýsem adaty modelde-de bolar. Emma iPhone 17 Air (ýa-da Slim) modelinde bu aýratynlygyň bolup-bolmajakdygy entek belli däl.
ProMotion-dan başga-da, esasy iPhone 17-de şu täzelikleriň hem bolmagyna garaşylýar: täze A19 prosessory we keseligine ýerleşdirilmegi ähtimal täzelenen kamera blogy.
Eger-de bu maglumatlar tassyklansa, iPhone 17 modeli ProMotion displeýini we Always On funksiýasyny aljak adaty iPhone-laryň ilkinjisi bolar. Bu aýratynlyklara 2021-nji ýyldan bäri köp sanly ulanyjylar garaşýarlar.
