Şwesiýada iki sany seýrek duş gelýän artefakt tapyldy. Olar - wikingler döwründen galan demir bilezik we agramy bir kilograma golaý bolan gadymy altyn tork. Bu barada Heritage Daily we Arkeonews habar berýär.
Ýaşy, takmynan, 1000 ýyllyk demir bilezik Eland adasynyň batgalyk ýerlerinden tapyldy. Bilezik özboluşly bolup durýar - şuňa meňzeş tapyndylar, adatça, kümüşden ýa-da bürünçden ýasalan bolýar.
Bilezigiň iki gapdaly haýwan kelleleri bilen bezelipdir we uzaboýuna düşnüksiz nokatlardan nagyş çekilipdir. Alymlaryň pikirine görä, bu tapyndy gurbanlyk hökmünde ulanylan bolup biler. Ýakyn wagtda gazuw-agtaryş işleriniň geçirilýän meýdançasynda goşmaça barlaglary geçirmek meýilleşdirilýär.
Eland häzirki wagtda Şwesiýanyň ikinji uly adasy hasaplanýar, emma wikingler döwründe bu iri söwda we senetçilik merkezi bolupdyr.
Şol bir wagtyň özünde, Trollhettan şäherinde (Şwesiýanyň günbataryndaky Wästra Götaland okrugy) geçirilen gazuw-agtaryş işleri mahalynda arheologlar özboluşly altyn torky tapdylar. Onuň ululygy 23,5 santimetr, agramy bolsa bir kilogram töwerekdir.
Alymlar bu boýun halkasynyň Skandinawiýada ýasalandygyna ynanýarlar. Bezegiň bu görnüşini, adatça, öz döwrüniň iň güýçli adamlary dakynypdyr.
