Sport harytlaryny, egin-eşikleri we aýakgaplary öndürýän dünýäniň iň iri korporasiýalaryndan biri bolan Nike şu çärýegiň ahyrynda satuwlarynyň pese gaçyp biljekdigini duýdurdy. Munuň sebäbi bolsa, ABŞ-nyň hökümeti tarapyndan girizilýän täze salgytlar bolup durýar. Kompaniýanyň çaklamalaryna görä, bu pese gaçyş 10%-den 20%-e çenli bolup biler. Bu barada «CNBC» habar berýär.
«Häzirki wagtda biz birnäçe negatiw faktoryň täsirinde işleýäris, olaryň hatarynda bazardaky näbellilik, ýokary geosyýasy dartgynlylyk, täze salgytlar, walýutanyň durnuksyz hümmeti we salgyt düzgünleşdirmeleri bar. Bularyň ählisi sarp edijileriň ynamyna täsir edýär» — diýip, kompaniýanyň maliýe müdiri Mett Frend analitikler bilen geçiren telefon ýygnagynda aýtdy.
Nike kompaniýasynyň çärýeklik satuw baradaky çaklamasy, LSEG-iň soragnamasyna gatnaşan analitikleriň garaşan görkezijisinden hem pes boldy. Olar satuwlaryň 11,4% azaljakdygyny çaklapdylar. Bu beýanatlardan soň kompaniýanyň paýnamalarynyň bahasy 2% aşaklady. Birža söwdasy tamamlanandan soň bolsa, bahalary ýene 6% pese gaçdy.
