Xiaomi kompaniýasynyň ýolbaşçysy Leý Szýun Hytaýyň sosial torlarynda täsin bir wideo paýlaşdy. Ol wideoda kompaniýanyň zawodynyň altynjy gatyndan bir garpyzy aşak taşlaýar. «CarNewsChina» neşiriniň ýazmagyna görä, bu täsin synag «SU7 Ultra» supersedanyň batareýasynyň mehaniki täsirlere nähili durnuklydygyny görkezmek üçin edildi.
Wideodaky garpyz adaty garpyza meňzemeýär. Ol çal-polat reňkli, demir top ýaly görünýär. Garpyz asfalta düşende döwülmelidi, şol bir wagtda oňa hiç zeper hem ýetmedi. Sebäbi onuň ýüzi ýörite berk örtük bilen örtülen. Şol örtük elektrokaryň batareýasynda hem ulanylýar. Ol heläkçilik bolan ýagdaýynda, ulagyň batareýasyna zeper ýetmeginiň öňüni almak üçin ýörite işlenip taýýarlanan.
«SU7 Ultra» modeli 93,7 kWt sygymly CATL batareýasy bilen üpjün edilýär. Xiaomi ony aýratyn gorag ulgamlary bilen berkidýär. Batareýanyň içinde termiki, elektrik we mehaniki gorag ulgamlary bar. Metal karkas bilen örtülen we ýylylygy kadalaşdyryş ulgamy bilen enjamlaşdyrylan batareýanyň zarýadyny bary-ýogy 11 minutda 10%-den 80%-e çenli dolduryp bolýar. Şeýle-de 1548 at güýjüni öndürýän üç sany elektrikli hereketlendiriji bilen enjamlaşdyrylan elektrokar, bir gezeklik zarýad bilen 620 kilometr ýol geçip bilýär.
