Ýakynda ortaça arzan smartfonlaryň bazarynda bäsdeş brendlerden iki smartfon peýda boldy – Google Pixel 9a we Apple iPhone 16e. Bilermenler haýsysynyň dürli ulanyjylar üçin laýykdygyny anyklamak maksady bilen, olary kuwwaty, kameralary we bahalary taýdan deňeşdirdi.
Gurluşlaryň ikisi-de dürli islegli ulanyjylar üçin niýetlenýär. Android Authority kompaniýalaryň garaşylmadyk ýagdaýda ýerlerini çalşandygyny belleýär. Eger ozal iPhone-y adaty ulanyjy, Pixel-i bolsa tehnologiýa muşdaklary saýlan bolsa, häzir bu tersine boldy. iPhone 16e çylşyrymly meseleler üçin kuwwatly gural, Pixel 9a bolsa ulanmakda ykjam we ýönekeý gural boldy.
iPhone 16e oýunlar we gündelik ýumuşlar üçin ýokary öndürijilikli A18 çibi bilen enjamlaşdyryldy. Pixel 9a-da oturdylan Tensor G4 çibi sähel kämilleşdirildi we köptaraplaýynlyga däl-de, netijelilige üns berildi.
Emeli aň taýdan Pixel 9a smartfony Gemini AI-iň netijesinde öňdebaryjy boldy, iPhone 16e-däki Apple Intelligence bolsa häzirlikçe yza galýar – köp wada berlen funksiýalar gijikdirilýär, elýeterli funksiýalar bolsa garaşylyşy ýaly birkemsiz işlemeýär. Ýöne esasy EA mümkinçilikleriniň Gemini programmasy arkaly iki platformada hem elýeterlidigini bellemek gerek.
iPhone 16e-niň dizaýny düýpgöter täzelendi – indi bu Face ID-li döwrebap flagmandyr. Pixel 9a diňe kosmetiki üýtgeşmelere eýe boldy.
Pixel 9a-nyň kameralary (48 Mp we 13 Mp) Macro Focus we ýyldyzlary surata almak ýaly funksiýalary hödürläp, iPhone 16e-niň ýeke modulyndan üstün çykýar.
Pixel 9a-nyň bahasy - $499, iPhone 16e - $599. Ýöne iPhone gymmatyny uzak saklaýar we kuwwatly prosessorynyň netijesinde geljek üçin has gowy taýýarlanan.
Ahyrynda bilermenler haýsy smartfony saýlamalydygynyň ulanyjynyň ileri tutmalaryna baglydygy baradaky netijä geldi: Pixel 9a foto we tygşytlylyk, iPhone 16e uzak wagtlap ulanmak we oýunlar üçin laýyk geler.
