Opel meşhur «Corsa» modeliniň täze we has elýeterli bahadan Business Edition görnüşini hödürledi diýip, «32CARS» habar berýär.
Täzelenmeler 1,2 litrlik, 100 at güýjüni öndürýän benzinli hereketlendirijili görnüşine, şeýle hem gibrid we doly elektrikli görnüşlerine degişli. Mysal üçin, benzinli «Corsa Business Edition-yň» bahasy indi 23999 ýewrodan başlaýar, öňki bahasy 26649 ýewrody.
Şol bir motory bolan, awtomat karobkaly gibrid wersiýasynyň bahasy 25999 ýewrodan başlaýar, öňki bahasy 28400 ýewrody. Doly elektrik energiýasy bilen işleýän, 50 kWt-sagatlyk batareýaly we 136 at güýjüni öndürýän «Corsa Electric» modeliniň bahasy bolsa, indi 28999 ýewro, bu hem öňküsinden 4,5 müň ýewro arzan. 156 at güýjüni öndürýän we 51 kWt-sagatlyk batareýaly has güýçli «Corsa Electric» modeliniň bahasy 29999 ýewrodan başlaýar we bu hem alyjylara 4,5 müň ýewro tygşytlamaga mümkinçilik berýär.
Täze model käbir peýdaly aýratynlyklar bilen baýlaşdyrylan: yzky kamera, öňdäki park sensorlary we elektrikli aýnalar. «Opel Corsa» 2025-nji ýylda hem şäherde we iş maksatly ulanylýan iň amatly ýeňil awtoulaglaryň biri bolup galýar.
