21-nji martda Ahal welaýatynyň Ak bugdaý etrabyndaky “Nowruz ýaýlasynda” Milli bahar baýramy — Halkara Nowruz güni mynasybetli esasy dabaralar ýaýbaňlandyryldy.
Baýramçylyk dabaralarynda halkymyzyň gadymdan gelýän, parahatçylyk söýüjilige, hoşniýetli goňşuçylyga, dostluga, açyklyga, zähmetsöýerlige, döredijilige esaslanýan däp-dessurlary öz beýanyny tapdy.
Folklor-etnografik sahna eserlerinde, artistleriň çykyşlarynda gadymy döwürlerden şu günlere çenli gelip ýeten Nowruz baýramynyň taryhy hem-de däpleri janlandyryldy. “Nowruz ýaýlasynda” bezemen ak öýler dikilip, türkmen obasynyň keşbi emele getirildi. Onda halkymyzyň ýaşaýyş-durmuş, maşgala bilen bagly däp-dessurlary, oba durmuşynyň aýratynlyklary şöhlelendirildi. Şeýle hem bu ýerde milli amaly-haşam sungatynyň eserleri, senetleriň görnüşleri görkezildi.
“Nowruz ýaýlasynda” ýaýbaňlandyrylan baýramçylyga bagyşlanyp, Türkmenistanyň sungat ussatlarynyň konserti geçirildi. Konsertiň maksatnamasyna Garaşsyz, hemişelik Bitarap Watanymyzy, Berkarar döwletiň täze eýýamynyň Galkynyşy döwrüni, gazanylýan uly üstünlikleri, agzybir türkmen halkyny wasp edýän aýdym-sazlar, tans we halk döredijilik eserleri girizildi. Meşhur aýdymçy-sazandalar, söz ussatlary, “Meňli”, “Laçyn”, “Galkynyş”, “Serpaý”, “Aşgabat”, “Näzli”, “Miras” we beýleki döredijilik toparlary öz zehinini görkezdiler. Joşgunly küştdepdi tansy konsertiň iň şowhunly çykyşlarynyň biri boldy.
Milli bahar baýramy — Halkara Nowruz güni mynasybetli dabaralar ýurdumyzyň welaýatlaryndaky “Türkmeniň ak öýi” binalarynyň öňündäki meýdançalarda, Arkadag şäherinde hem geçirildi.
