Ispaniýada arheologlar Günbatar Ýewropada häzire çenli belli bolan adam galyndylarynyň iň gadymysynyň süňk böleklerini – ýitip giden görnüşiň uly ýaşly wekiliniň çep ýaňagyny we ýokarky äňini tapdy. The Guardian neşiriniň maglumatlaryna görä, tapyndynyň ýaşy 1,1-1,4 mln ýyl diýlip hasaplanýar.
Bu açyş irki pleýstosen döwründe Pireneý ýarym adasynda gadymy adamlaryň azyndan iki görnüşiniň ýaşandygyny tassyklaýar. Galyndylar Burgosdaky Sima-del-Elefante gowagynda tapyldy.
Ozal sebitde iň gadymy adam galyndylary diýlip bu gowakdan tapylan 1,1-1,2 mln ýaşly äň süňkleriniň we dişleriniň bölekleri hasaplanýardy.
Alymlar täze görnüşiň Homo erectus-a ýakyndygyny çaklap, ony Homo affinis erectus diýip belledi. Ýöne tapyndy Pink Floyd toparynyň hormatyna “Pink” resmi däl adyny aldy. Bu olaryň “The Dark Side of the Moon” albomynyň ady bilen baglanyşyklydyr. Ol latynça “La cara oculta de la Luna” diýlip terjime edilýär we bu ýerde cara oculta “gizlin ýüz” diýmegi aňladýar.
Doktor Mariýa Martinon-Torres “Pinkiň” aýratynlyklarynyň arasynda Homo antecessor bilen deňeşdirilende burnuň has tekiz gurluşyny belledi.
Britaniýaly alym Kris Stringer bu galyndylary “örän möhüm tapyndy” diýip hasaplaýar.
