Germaniýanyň Opel awtoöndürijisi ykjam Rocks elektromobiliniň täzelenen wersiýasyny hödürledi. Minimalizme kowalaşmak bilen kompaniýa hatda ulagda adaty kondisioner hem oturtmady diýip, Carscoops habar berýär.
Ýewropa we amerikan düzgünlerine görä, Rocks 15 ýaşdan başlap sürüji şahadatnamasy bolmazdan sürüp boljak agyr kwadrosikl hasaplanýar.
Model 2021-nji ýylda Rocks-e hökmünde peýda boldy, ýöne soň Rocks Electric adyny aldy. Stellantis konserniniň düzümine girýän nemes brendiniň elektrokary Citroen Ami we Fiat Topolino ulaglaryna esaslanýar. Onuň esasy bäsdeşi Renault Mobilize Duo hasaplanýar.
Ýakynda uly üýtgeşmelere eýe bolan Citroen Ami-den tapawutlylykda, Opel Rocks öňki dizaýnyny saklap galdy. Öň bölegini yzkydan tapawutlandyrmak kyn, diňe oturgyçlaryň ugry boýunça kesgitläp bolýar. Awtomobil iki gapy bilen üpjün edildi: sürüji gapysy Rolls-Royce-yňky ýaly hereketiň garşysyna, ýolagçy gapysy adaty görnüşde açylýar.
Täzelikleriň arasynda gara radiator gözenegi we yşyk diodly faralar bar. Interýerde bolsa diňe ak-çal reňk gammasy galdyryldy.
Multimedia ulgamynyň deregine smartfon saklaýjysy we ýörite firma programmasy bar. Şeýle-de, USB porty, panorama üçegi we elde açylýan gapdal aýnalary bar.
Elektromotoryň kuwwaty 8 at güýjüne deň. Geçýän menzili – 75 km çenli. Iň ýokary tizligi – 45 km/sag. Satuwyň başlanjak senesi we bahasy heniz yglan edilmedi.
