Caviar kompaniýasy dünýäniň uly şäherleriniň ruhuny, özboluşlylygyny we gözelligini özünde jemleýän «Horizon» atly täze smartfon kolleksiýasyny hödürledi. Olaryň her birinde ussat zergärlik bilen ýokary hilli materiallar utgaşdyrylypdyr.
Bu kolleksiýany taýýarlamak üçin kompaniýa 24 karatlyk altyny, awiasiýa titanyny, tebigy daşy we ýagty emaly ulanypdyr.
Londonyň iPhone 16 Pro we Pro Max üçin taýýarlanan görnüşi jikme-jikliklerindäki nepisligi bilen tapawutlanýar. «Big Beniň» gülgüne altyndan ýasalan 3D şekili we el bilen işledilýän mehaniki tigiri bu modeli deňsiz-taýsyz edýär. Jemi nusgasy – bary-ýogy 10 sany.
Gibraltar görnüşi Ortaýer deňziniň ajaýyplygyny özünde jemleýär. Ak reňkli titandan ýasalan korpusy Barbari makaklarynyň, altyn palma agaçlarynyň nagyşlary we zümerret emaly bilen bezelen. Eksklýuziwlik tassyklandy: diňe 10 nusgada öndürildi.
Bagama görnüşi tropiki howany ýadyňa salýar. Ak daş, sary güller we gülgüne altyn utgaşyp, ýyly we ekzotik atmosferany döredýär. Nusga – 10 sany.
Şanhaý görnüşi Huawei Mate X6 modeli esasynda taýýarlanylan we futuristik dizaýna eýe. Gara titandan ýasalan korpusda Şanhaý diňiniň we Gündogaryň merjeni binasynyň altyn nagyşlary ýerleşýär. Görnüşiň 99 nusgasy elýeterli.
Dubaý görnüşi – hakyky baýlygyň nyşany. Gara titanyň ýüzünde altyndan ýasalan Burj-Halifa binasynyň we Palma adalarynyň şekilleri ýerleşdirilipdir. Bu dizaýna diňe 99 müşderi eýe bolup biler.
«Horizon» kolleksiýasynyň smartfonlarynyň bahalary Gibraltar görnüşindäki iPhone 16 Pro üçin 8,9 müň dollardan başlaýar. Iň gymmat görnüşi bolsa Dubaý modeli bolup, iPhone 16 Pro Max üçin 13,7 müň dollar diýlip bahalandyrylýar.
Has hem eksklýuziw we aýratyn smartfon edinmek isleýänler üçin, Caviar müşderiniň talap eden şäherinden ýa-da meşhur ýadygärliklerinden ylham alnyp taýýarlanan dizaýnlary döretmek mümkinçiligini hödürleýär.
