Huawei kompaniýasy Kirin X90 atly täze prosessoryny resmi taýdan sertifikatlaşdyrdy. Çaklanylmagyna görä, bu prosessor noutbuklar üçin niýetlenen. Internet sahypalarynda bu täzelik bilen baglanyşykly ilkinji maglumatlar peýda boldy diýip, «Gizmochina» habar berýär.
«Huawei Central» portalynyň maglumatlaryna görä, ARM arhitekturasy esasynda taýýarlanylan bu prosessor Apple-yň M seriýaly çiplerine alternatiwa hökmünde hödürlener. Berilýän maglumatlara görä, täze prosessor 5G modemi bolan wersiýasy bilen çykarylar we ol SMIC kompaniýasynyň 7 nm tehnologiýasy esasynda öndüriler.
Täze prosessor bilen enjamlaşdyrylan Huawei noutbuklary Windows-yň deregine HarmonyOS Next operasion ulgamy bilen hödürlenip bilner. Sebäbi Microsoft kompaniýasynyň Huawei bilen hyzmatdaşlyk etmek boýunça ygtyýarnamasy mart aýynyň ahyrynda tamamlanýar. Häzirki wagtda bu täze prosessor (SoC) we onuň esasynda çykaryljak enjamlaryň tehniki aýratynlyklary barada goşmaça maglumat ýok.
