Huawei täze innowasion önümleri hödürlemäge taýýarlanýar. HuaweiCentral neşiri insaýdere salgylanmak bilen, üç eplenýän displeýli smartfonyň täze wersiýasy bolan Mate XT 2-iň şu ýylyň ahyrynda köpçülikleýin öndürilip başlanjakdygyny, ondan biraz öň bolsa kompaniýa dünýäde ilkinji süýşýän ekranly smartfonyny hödürlejekdigini habar berdi.
2024-nji ýylyň güýzünde ilkinji gezek çykan flagman Mate XT hakyky şowhun döretdi. Bu dünýäde ilkinji 10 dýuýmlyk üç eplenýän smartfon. Ol gyşyň aýagynda dünýä bazarynda satuwa çykdy we henizem oňa taý geljek bäsdeş ýok. Samsung şeýle enjamyň prototipiniň üstünde işleýärkä, Huawei eýýäm meşhur smartfonynyň ikinji neslini döretmegiň üstünde işleýär. Insaýder Mate XT 2-niň 2026-njy ýylyň birinji ýarymynda satuwa çykaryljakdygyny tassyklaýar.
Süýşýän smartfon hakda maglumat az. Ekranyň diagonaly görkezilmedi, ýöne şeýle enjamlaryň prototipleri, adatça, 6 dýumdan 8 dýuýma çenli ulalýan ykjam ekranlary hödürläpdiler.
HuaweiCentral kompaniýanyň indi birnäçe ýyl bäri süýşýän smartfon tehnologiýalaryny patentleýändigini belleýär. Samsung, Oppo, Xiaomi we Motorola ýaly bäsdeşler hem prototiplerini görkezdiler, ýöne entek köpçülikleýin öndürmeklige geçip bilenoklar.
Esasy tehniki mesele ykjamlyk bolup galýar: şeýle enjamlara güýçli batareýa ýerleşdirmek kyn. Süýşýän smartfonlaryň prototipleri bary-ýogy 3000 mAh batareýalar bilen enjamlaşdyryldy. Huawei bu meseläni täze kremniy-uglerod batareýasy tehnologiýasy bilen çözüp biler.
