Renault fransuz awtoulag öndürijisi täze R5 Turbo 3E kiçi elektrosportkaryny hödürledi. Bu sportkar kompaniýanyň mundan 40 ýyl ozalky ralli ýaryşlarynda gazanan üstünliklerini ýatladýar. Täze model 2027-nji ýylda satuwa çykarylar diýip, «Wired» neşiri habar berýär.
«Wired» neşiriniň belleýşi ýaly, bu «gyzgyn» hetçbekden bary-ýogy 1980 sany öndüriler. Sportkar adaty bolmadyk yzky tekerlerden hereket getiriji ulgamy bilen iki sany elektrikli hereketlendirijiden ybarat bolup, jemi 500 at güýjüni öndürer. Uzyn kapotly kiçi awtoulag 100 km/sag tizlige bary-ýogy 3,5 sekuntdan az wagtda ýetip biler we iň ýokary tizligi bolsa 270 km/sag bolar.
Awtoulag karbon süýümden ýasalan monokok karkasy, dik ýerleşdirilen el tormozy, ýörite sport oturgyçlary we 6 nokatly howpsuzlyk kemerleri bilen tapawutlanýar. Şeýle-de 20 dýuýmlyk uly tekerleri awtoulagyň sport häsiýetini güýçlendirýär.
Bu sportkaryň eýeleri zarýad bekedinde köp garaşmaly bolmazlar. Sebäbi 800 woltlyk energiýa ulgamy bilen enjamlaşdyryljak hetçbek, 350 kWt kuwwatly zarýad bekedine birikdirilende, batareýasyny bary-ýogy 15 minutda 15%-den 80%-e ýetirmäge mümkinçilik berer.
Başlangyç bahasynyň 168 müň dollar diýlip kesgitlenmegi sebäpli, Renault R5 Turbo 3E-ni satyn aljak müşderilere giň görnüşdäki dizaýn elementlerini saýlap almaga mümkinçiligi berler. Şeýle-de sportkaryň kuzowynyň reňkleri hem müşderileriň islegine görä üýtgediler.
Öňünden sargyt kabul edişlik ýene birnäçe hepdeden başlar, şeýle-de bolsa ilkinji awtoulaglar müşderilere 2027-nji ýylda gowşurylar. Goşmaça opsiýalar bilen bu hetçbegiň bahasy 260 müň dollara çenli ýokarlanyp biler.
