Firefly Aerospace amerikan kompaniýasy Blue Ghost Aýa gonuş modulynyň missiýasynyň tamamlanandygyny habar berdi. 17-nji martda agşam kompaniýa enjam tarapyndan düşürilen soňky suratlary hödürledi. Olarda Günüň batyşy görünýär.
Enjam Ýere soňky habaryny iberip, uka gitdi. Ol gyzdyryjylar bilen enjamlaşdyrylmady, şol sebäpli iki hepdelik sowuk Aý gijesine çydamasa gerek.
Blue Ghost hemranyň üstüne gonan ilkinji hususy enjam däl, ýöne muny tehniki kynçylyklar ýa-da bökdençlikler bolmazdan başaran ilkinji enjamdyr. 2025-nji ýylyň 2-nji martynda ol Aýyň görünýän tarapynda ýerleşýän Mare Crisium-daky Mons Latreille wulkanynyň golaýynda asuda gondy.
Iki hepdäniň içinde modul birnäçe möhüm tejribeleri geçirdi.
Mysal üçin, onuň bortunda LuGRE kabul edijisi bardy, ol Ýerden 364 müň km uzaklykda – hem uçuşda, hem Aýyň üstünde GPS signallaryny tutmagy başardy. Bu üstünlik Artemis missiýalaryna nawigasiýa üçin GPS ulanmaga kömek eder.
Blue Ghost ylmy maksatnamasynyň esli bölegi Aýyň gurluş aýratynlyklaryny öwrenmäge bagyşlandy. Tejribeleriň birinde enjam regoliti burawlap, LISTER zonduny bir metr çuňluga goýberdi. Ol çuňlukdan gelýän ýylylyk akymyny ölçedi.
Başga bir tejribäniň çäklerinde enjam elektrik we magnit meýdanlaryny ölçemek üçin bäş datçigi işjeňleşdirdi. Olar bilen ýygnalan maglumatlar alymlara Aýyň içki gurluşyny 1120 km çuňluga çenli häsiýetlendirmäge mümkinçilik berer.
Şeýle-de, Blue Ghost Aý tozanyndan goramak üçin niýetlenen elektrodinamiki ekrany synagdan geçirdi. Işledilenden soň ol Aý regolitini aýnanyň we ýylylyk radiatorynyň üstünden üstünlikli aýyrdy.
Missiýanyň dowamynda ençeme suratlar, aýratynam, 14-nji martda doly Gün tutulmasynyň haýran galdyryjy suratlary alyndy. Surveyor 3 1967-nji ýylda Aýdan doly Gün tutulmasyny surata düşüren bolsa-da, Blue Ghost-yň kadrlary hadysanyň ilkinji reňkli suratlary we täze hil standarty boldy.
Umuman, iki hepdelik missiýanyň dowamynda modul Ýere 119 gigabaýt maglumat ýygnap iberdi.
Indi bolsa enjam uka gidip, öz-özüne ýadygärlige öwrüldi.
