ABŞ-da Disney studiýasynyň 1937-nji ýyldaky multfilminiň remeýki bolan “Garpamyk” filminiň premýerasy boldy. Film daşary ýurt prokatyna 21-nji martda çykar.
Variety filmiň ilkinji tomaşaçylaryň göwnünden turandygyny ýazýar. Olar filmi “soňky birnäçe ýylda iň gowy remeýk” diýip atlandyrdylar. Köpler Garpamygyň keşbini ýerine ýetiren Reýçel Zegleriň ynandyryjy çykyşyna ýokary baha berdi.
Zalym Şa aýalynyň keşbini “Täsin zenan” (Чудо-женщина) filmi bilen tanalýan Gal Gadot ýerine ýetirdi. Režissýor hökmünde “Tomsuň 500 güni” (500 дней лета) filmini dörediji Mark Uebb çykyş etdi. Filmiň býujeti azyndan 250 mln dollar boldy.
Tankytçylar 19-njy marta çenli syn bermekden saklanýar, diňe şondan soň hünärmenleriň tomaşaçylaryň garaýyşlary bilen ylalaşjakdygy ýa-da ýokdugy belli bolar.
Şol bir wagtyň özünde, eýýäm kasting tapgyrynda film baş keşbe asly kolumbiýaly Reýçel Zegleriň tassyklanmagy sebäpli tankyda sezewar boldy. Ony Garpamygyň keşbi üçin has garaýagyz hasapladylar. Awtorlaryň nusgawy hekaýa bolan çemeleşmesi, köplere belli bolan ertekiden gyşarmalar hem tankyt edildi. Şeýle-de, baş keşpleri ýerine ýetirijileriň – Garpamygy oýnan Zegleriň we zalym aýaly oýnan ysraýylly Gal Gadotyň düýpgöter tapawutlanýan syýasy garaýyşlary ýene bir meselä öwrüldi.
