Russiýada soňky 10 ýylyň dowamynda gar barslarynyň sany 10-dan 87-ä çenli artdy. Bu barada Russiýanyň sebitara «Irbis» assosiasiýasynyň başlygy Ali Uzdenowa salgylanyp, «TASS» agentligi habar berýär.
«Adamlaryň täsiri, iýmit çeşmeleriniň azlygy, gar barslarynyň hem-de olaryň iýmitlenýän toýnakly haýwanlarynyň awlanylmagy, magdan känleriniň işlenmegi we başga-da birnäçe sebäpler gar barslarynyň sanynyň azalmagyna sebäp bolupdy. 10 ýyl mundan ozal Russiýanyň çäginde bary-ýogy 10-15 sany gar barsy bardy. 2024-nji ýylda ilkinji gezek tutuş Russiýa boýunça hasaba alyş geçirdik we häzirki wagtda olaryň sanynyň 87-ä ýetendigini anykladyk» — diýip, Uzdenow aýtdy.
Onuň aýtmagyna görä, gar barslary häzirki wagtda Russiýanyň dört sebitinde – Altaý Respublikasynda, Tuwada, Burýatiýada we Krasnoýarsk ülkesinde ýaşaýarlar. Gar barslary Russiýanyň Gyzyl kitabyna «ýitip gitmek howpy abanýan» görnüş hökmünde girizilen – bu iň ýokary gorag derejesidir.
Şeýle-de 13-15-nji mart aralygynda Kazan şäherinde «Dünýädäki gar barslaryny öwrenmek we gorap saklamak» atly halkara maslahat geçirildi. Bu çärä Russiýadan, Owganystandan, Butandan, Hytaýdan, Hindistandan, Gazagystandan, Gyrgyzystandan, Mongoliýadan, Nepaldan, Pakistandan, Täjigistandan we Özbegistandan jemi 180 wekil gatnaşdy.
