Apple kompaniýasy AirPods nauşnikleri söhbetdeşiň sözlerini häzirki wagtda başga dile terjime edip biljek funksiýany goşmagy meýilleşdirýär diýip, Bloomberg habar berýär.
Agentligiň žurnalisti Mark Gurman çeşmelere salgylanyp, bu funksiýanyň 2025-nji ýylda AirPods programma üpjünçiliginiň täzelenmeginiň bir bölegi hökmünde hödürlenjekdigini habar berdi. Ol iPhone üçin operasion ulgamynyň täzelenen wersiýasy bolan iOS 19-yň çykmagy bilen baglanyşykly bolar.
Žurnalistiň berýän maglumatlaryna görä, täze funksiýa AirPods-yň ulanyjylaryna “Ýyldyz ýoly” (“Звездный путь”) serialyndaky gahrymanlar ýaly aragatnaşyk gurmak mümkinçiligini berer: eger iňlisçe gürleýän adam ispan dilini eşitse, iPhone ony terjime eder we ulanyjynyň nauşniklerine iňlis dilinde geçirer. Şol bir wagtyň özünde iňlis dilinde gürleýän adamyň sözleri ispan diline terjime ediler.
Apple kompaniýasynda bu barada teswir bermekden saklandylar.
Bloomberg-iň belleýşi ýaly, AirPods-iň täze funksiýasy - bu Apple-iň şu ýyl meýilleşdirýän düýpli programma özgertmeleriniň bir bölegidir. Bu agentlik ozal Apple-iň iPhone-yň, iPad-iň we Mac-iň interfeýsini düýpgöter üýtgedip, operasion ulgamlarynyň daşky görnüşini çalyşjakdygyny habar beripdi.
Apple-iň bäsdeşleri terjime funksiýasy bolan nauşikleri eýýäm çykaryp gelýärler. Şuňa meňzeş funksiýa Google Pixel Buds nauşniklerinde eýýäm bar.
