Slowakiýadaky Tatra milli seýilgähinde samyr suw arassalaýyş stansiýasy bilen suw geçiriji desgalaryň arasynda bent galdyrdy. Indi onuň bu desgasy golaýdaky obalaryň bäş müňden gowrak ýaşaýjysyny suwsuz goýup biler diýip, goraghananyň metbugat gullugy habar berýär.
Milli seýilgähiň wekilleri bu ýagdaýy ekoaktiwistler bilen maslahatlaşyp, hem suw üpjünçiligini, hem haýwany goramak üçin çäreleri kabul etdi. Ýagny, suwy akdyrmak üçin turbalary geçirmek, samyrlaryň gemirýän agaçlarynyň daşyny bolsa gorag tory bilen aýlamak kararyna gelindi diýip, Korzár neşiri habar berýär.
Milli seýilgähi goramak boýunça direktor Ýan Sliwinskiniň aýtmagyna görä, samyrlaryň işjeňligine eýýäm on ýyl bäri syn edilýär. Ilkinji bentler Muranyň golaýyndaky Polýanada derýanyň sag kenarynda peýda boldy. Ýöne ýylyň başynda samyr, ähtimal, iýmit gözläp başga kenara geçen bolsa gerek.
“Goralýan haýwanyň işjeňligi suw alýan desga howp salýar we suw çeşmesiniň zaýalanmagyna getirip, suwuň hilini ýaramazlaşdyryp biler” – diýip, PVPS-niň önümçilik we tehniki direktory Mihal Wasserman aýtdy.
Belläp geçsek, samyrlar soňky döwürde habarlaryň gahrymanyna öwrülýär. Mundan öň Çehiýada bir samyr iki günde bent gurup, muny etmek islän ýerli häkimiýetleriň meýilnamalaryndan öňürtdi. Desganyň netijesinde şäher häkimligi 30 mln çeh kronasyny (130 müň dollardan gowrak) tygşytlady.
