Disney «Lilo we Stiç» atly multfilmiň hakyky aktýorlar bilen düşürilen filminiň ilkinji doly treýlerini hödürledi. Filmiň premýerasy 23-nji maýda bolar.
2000-nji ýyllardaky asyl multfilmde bolşy ýaly, bu film hem Lilo atly ýalňyzja gyzjagaz bilen «haos we weýrançylyk üçin doglan» Stiç atly kesekiniň arasyndaky dostluk barada gürrüň berer.
Lilonyň keşbini Maýýa Kiloha ýerine ýetirýär, Stiçi bolsa asyl multfilmiň režissýory, ssenaristi we seslendirijisi Kris Sanders seslendirýär. Şeýle-de filmde Zak Galifianakis, Sidni Agudong, Billi Magnussen, Kaýpo Duduit we Kortni B. Wens çykyş eder.
Filmiň režissýory «Oskar» baýragyna dalaşgär, «Marsel, ädiklije balykgulak» (Марсель, ракушка в ботинках) atly multfilmi bilen tanalýan Din Fleýşer Kemp boldy.
Asyl «Lilo we Stiç» multfilminiň premýerasy 2002-nji ýylda bolupdy. Film bütin dünýäde 273 million dollar girdeji gazandy, dowamy düşürildi we «Iň gowy doly metražly animasion film» nominasiýasy boýunça «Oskar» baýragyna dalaşgär görkezildi.
