Toyota 2026-njy ýylyň ahyryna çenli elektrik pikabyny çykarjakdygyny resmi taýdan tassyklady diýip, «Autoevolution» neşiri habar berýär.
Ýapon awtoulag ägirdi bu barada hiç hili jikme-jik maglumat bermän gelýär. Bize mälim bolan zat – pikabyň dört gapyly kabinasynyň boljakdygy we onuň dünýä bazary üçin niýetlenjekdigidir. Heniz onuň «HiLux» ýaly çarçuwaly platformada gurlup-gurulmajakdygy ýa-da gurluşynyň ýeňil awtoulaglaryňka meňzäp-meňzemejekdigi belli däl. Eger çarçuwaly platforma ulanylsa, bu model «Ford F-150 Lightning» bilen bäsleşer, ýeňil awtoulagyň gurluşynda bolsa «Toyota EPU» konseptiniň önümçilikdäki görnüşi bolar. Bu konsept model «HiLux-a» garanyňda has ykjamdyr.
Pikabyň Ýewropada satuwa çykmagyna eýýämden rugsat berildi.
Mundan ozal, Toyota bir adamlyk kabinasy we çäkli menzili bolan elektrikli «HiLux-y» tanyşdyrypdy. Onuň önümçiligine 2025-nji ýylda Tailandda başlamak meýilleşdirilýär. Emma täze çap edilen tanyşdyryş şekili (tizer) Ford, Isuzu we Mitsubishi ýaly brendleriň pikaplaryna bäsdeş bolup biljek, iki hatarly we doly göwrümli pikabyň gelýändigini görkezýär.
