Amerikan startaplary 2024-nji ýylyň dördünji çärýeginde, takmynan, 80 milliard dollarlyk maýa goýum çekdi – bu 2021-nji ýyldan bäri iň ýokary görkeziji boldy. Bu barada «PitchBook» analitika kompaniýasynyň maglumatlaryna salgylanyp, «Financial Times» (FT) neşiri habar berýär.
PitchBook-yň gözleg bölüminiň ýolbaşçysy Kaýl Stenford bu mukdaryň 40%-iniň OpenAI, xAI we Databricks ýaly alty iri startapyň geleşiklerine düşendigini belledi. Ol wençur maýa goýum bazarynda esasy kompaniýalaryň agdyklyk edýändigini hem belläp geçdi. PitchBook-yň maglumatlaryna görä, 2025-nji ýylyň birinji çärýeginde kompaniýalar eýýämden 30 milliard dollardan gowrak maýa goýum hem aldylar. Ýakyn wagtda ýene-de, takmynan, 50 milliard dollar möçberinde maýa goýumyň çekilmegine garaşylýar.
FT maýa goýumlaryň artmagyny emeli aň (EA) tehnologiýalarynyň ösmegi bilen baglanyşdyrýar. 2021-nji ýylda maýa goýumlaryň iň ýokary derejesine ýetmegi, maýa goýum tapgyrlarynyň ulalmagy we kompaniýalaryň bahalarynyň ýokarlanmagy bilen baglanyşykly bolupdy. Şonda hersi 100 million dollarlyk 854 şertnama baglaşylypdy. 2024-nji ýylda maýa goýumlaryň mukdary 2021-nji ýylyň derejesine golaýlaşdy. Emma bazar öňküsinden tapawutly ýagdaýda, has ýygnanyşykly we belli-belli iri kompaniýalaryň elinde jemlenýär.
Soňky iki hepdäniň dowamynda Stripe fintech kompaniýasy, kompaniýanyň umumy bahasyny 91,5 milliard dollar bilen kesgitlän täze maýa goýum tapgyryny hödürledi. Emeli aň pudagyndaky Anthropic startapy bolsa, kapitalizasiýa bahasynyň 61,5 milliard dollara ýetirmegi meýilleşdirýär. FT-niň maglumatlaryna görä, OpenAI kompaniýasy SoftBank bilen 260 milliard dollar bahalandyryş bilen, 40 milliard dollar möçberinde maýa goýum çekmek boýunça gepleşikleri geçirýär. Eger bu geleşik baglaşylsa, ol taryhdaky iň uly maýa goýum tapgyry bolar.
Hytaýyň tehnologiýa kompaniýalarynyň paýnamalary hem bir aýyň dowamynda, dörtden bir derejesinde gymmatlady. Bu ösüş DeepSeek kompaniýasynyň emeli aň modeliniň üstünlik gazanmagy bilen baglanyşykly. Ýatlatsak, bu model 2024-nji ýylyň ýanwar aýynyň ahyrynda hemmä elýeterli edilipdi.
