Barlaghanada ösdürilip ýetişdirilen et, süýt we şeker geljek iki ýylyň içinde ilkinji gezek Beýik Britaniýada satuwa çykyp biler. Bu barada Bi-bi-si habar berýär.
Azyk ülňüleri boýunça agentlik (FSA) barlaghana şertlerinde ösdürilip ýetişdirilen önümleri tassyklamak işini çaltlaşdyrmagyň ýollaryny öwrenýär. Şeýle önümler uly bolmadyk himiki fabrikalarda öýjüklerden ösdürilýär.
2020-nji ýylda Singapur adamlaryň sarp etmegi üçin öýjüklerden ösdürilip ýetirişdirilen etiň satuwyna rugsat beren ilkinji ýurt boldy. Üç ýyldan soň Birleşen Ştatlar hem onuň göreldesine eýerdi, geçen ýyl bolsa olaryň hataryna Ysraýyl goşuldy. Italiýa hem-de Alabama we Florida ýaly amerikan ştatlary, tersine, şeýle önümleriň satuwyny gadagan etdi.
FSA ýokary tehnologiýaly azyk kompaniýalarynyň hünärmenleri we akademiki gözlegçiler bilen hyzmatdaşlykda täze düzgünleri işläp düzer. Agentligiň bellemegine görä, häzir barlaghana şertlerinde ösdürip ýetirişdirilen önümleriň howpsuzlygyna baha bermek boýunça ikiýyllyk proses başlandy.
FSA-nyň baş ylmy işgäri, professor Robin Meý sarp edijileriň howpsuzlygynyň ileri tutulýandygyny belledi.
“Biz bähbitli bolup biljek, şol bir wagtyň özünde bu önümleriň mümkin boldugyndan ýokary howpsuzlyk derejesini üpjün etjek düzgünleşdiriş ulgamyny işläp taýýarlamak üçin gyzyklanma bildirýän kompaniýalar we ylmy toparlar bilen ýakyndan hyzmatdaşlyk edýäris” – diýip, ol belledi.
Barlaghanada ösdürilip ýetişdirilen azyk önümleri ownujak öýjüklerden ösdürilen ösümlik ýa-da haýwan dokumalarydyr.
