Lamborghini italýan lýuks awtoulag öndürijisi Beýik Britaniýanyň çaga harytlary öndürýän Silver Cross brendi bilen bilelikde işläp taýýarlan täze Reef AL Arancio «superkolýaska» modelini satuwa çykardy. Superkarlardan ylham alnyp döredilen kolýaska diňe ilkinji 500 müşderi üçin elýeterli bolar diýip, «Hypebeast» neşiri habar berýär.
Reef AL Arancio kolýaskasynyň dizaýny Lamborghini-niň «Huracan» we «Urus» sportkarlaryndan ylham alýar. Onuň ýaryş oturgyjyny ýada salýan sebedi zamş materialdan we tebigy bambukdan taýýarlanypdyr. Şeýle-de çagalar üçin amatly ergonomiki kelle goldawy bar. Kolýaskanyň «salony» zamş bilen örtülen bolsa, onuň daşky korpusy karbondan ýasalan.
Kolýaskanyň ähli tekerleri üçin doly asma ulgamy bilen üpjün edilendir. Şeýlelikde, ol hatda iň erbet ýollarda-da ýeňil hereket etmäge we çaganyň rahatlygyna zyýan ýetirmezlige mümkinçilik berýär. Kolýaskanyň tutawajy hem sportkarlaryň rullarynda ulanylýan ýokary hilli italýan deri bilen örtülendir. Şeýle-de tutawajyň üstünde Lamborghini brendiniň polatdan ýasalan nyşany ýerleşdirilipdir.
Şeýle-de kolýaskada el tormozynyň funksiýasyny ýerine ýetirýän tormoz ulgamy bar. Bu tormoz polatdan ýasalyp, ol «Huracan» modellerindäki hakyky tormoz pedallaryna meňzeýär.
Superkolýaska diňe bir reňkde – gara-narynç görnüşde hödürlenýär. Onuň bahasy 4000 funt sterling bolup, bary-ýogy 500 sanysy öndüriler. Satuwyna Ýewropada we ABŞ-da eýýämden başlandy.
