Asteroidleri öwrenmek üçin uçurylan ilkinji hususy kosmos enjamy bolan "Odin", 27-nji fewralda Falcon 9 raketasy bilen uçurylan dessine ýüze çykan tehniki näsazlyklar sebäpli işini dowam etdirip bilmedi.
Öndüriji AstroForge munuň üçin iki esasy sebäbi görkezdi: açylmadyk Gün panelleri sebäpli energiýanyň çäkliligi we ugrukdyryş ulgamyndaky näsazlyk sebäpli enjamyň durnuklylygyny ýitirmegi. Aýyň aňyrsyndaky orbita (Ýerden takmynan 435 müň km uzaklykda) üstünlikli ýerleşdirilendigine garamazdan, Odin ýerüsti stansiýalar bilen aragatnaşygy ýitirdi. Bu barada «Space.com» neşiri ýazýar.
Enjam bilen aragatnaşygy dikeltmek örän kyn boldy, sebäbi ýerüsti stansiýalaryň hem näsazlyklary bardy: birinde signal polýarlygy nädogry boldy, beýlekisinde bolsa antenna dogry gönükdirilmändi. Bu ýagdaý buýruklaryň geçirilmegini gijikdirdi we 36 sagatdan soň Odin bilen aragatnaşyk düýbünden kesildi. AstroForge çäkli energiýanyň antennany Ýere gönükdirmäge mümkinçilik bermändigini we ugrukdyryş näsazlygynyň enjamyň doly gözegçilikden çykyp, tertipsiz aýlanmagyna sebäp bolandygyny çaklaýar. Odin diňe wagtal-wagtal gowşak signallary iberip bilipdir.
Odin kosmos enjamy 10 aýdan hem az wagtda taýýarlandy we umumy çykdajysy 3,5 million dollara düşdi. Agramy 120 kg bolan bu enjam, 2026-2027-nji ýyllarda ýerine ýetirilmegi meýilleşdirilen Vestri missiýasynyň synag tapgyry bolup durýardy. Bu missiýanyň çäklerinde «2022 OB5» asteroidine gonup, platinoid gazyp almak göz öňünde tutulýardy.
