Apple kompaniýasy emeli aňyň kömegi bilen daşky gurşawy skanirläp, maglumatlary gaýtadan işlemek üçin Apple Intelligence-e geçirýän kameralary bolan AirPods-yň üstünde işleýär. Ol ulanyjylara smartfony çykarmazdan, ýerleşýän ýeriňi bilmäge, nawigasiýany almaga kömek edip, obýektleri suratlandyryp biler diýip, Bloomberg habar berýär.
Akylly görüş tehnologiýasy eýýäm iPhone 16-da işleýär, ýöne predmet ýa-da ýer barada zerur maglumaty almak üçin kamerany el bilen olara gönükdirmeli. AirPods muny awtomatik ýerine ýetirer. Kameralar çuňlugy kesgitleýän we hatda garaňkyda hem predmetleri tanaýan infragyzyl sensorlara eýe bolar. Şeýle kameralar energiýany tygşytlaýar we ekrana yzygiderli birikmegi talap etmeýär.
Şeýle tehnologiýanyň kömegi bilen EA kafe ugrukdyryp biler ýa-da ulanyjynyň nirede ýerleşýändigini habar bermek üçin ýazgylary, jaý belgilerini seljerip biler. Zerur binany gözlemek üçin, diňe kelläňi dogry tarapa öwürmek ýeterlik.
AirPods, aýratynam, görüş ukyby pes bolan adamlar üçin peýdaly bolar – olar diňe bir nawigasiýany bermän ýa-da obýektleri tanaman, eýsem päsgelçilikleri aýdyp biler.
Ilkibaşda Apple şeýle maksatlar üçin Apple Glass AR-äýnegini göz öňünde tutupdy, ýöne taslama agramy, gowşak awtonomlygy we dizaýn kynçylyklary sebäpli togtadyldy. AirPods-da bu meseleler ýok: olar ýeňil, göze agram salmaýar we islendik aksessuar bilen gabat gelýär. Şeýle-de, kompaniýa Ray-Ban stilinde kameraly äýnek çykarmagy göz öňünde tutdy, ýöne ýokary baha we oňaýsyzlyk bu pikiri aradan aýyrdy.
Häzirlikçe kompaniýa täze nauşnikleriň çykjak takyk senesini aýtmady, ýöne bilermenler munuň 2-3 ýyldan bolup biljekdigini çaklaýar. Şeýle nauşnikler dakylýan elektronikada uly öňegidişlik bolup biler.
