ChatGPT dünýä boýunça ofis-edaralarda iň meşhur emeli aň (EA) guraly boldy. Muny «DeskTime-yň» gözlegi tassyklaýar diýip, «TechRadar» habar berýär.
Maglumatlara görä, 2024-nji ýylyň dekabryna çenli bu EA guraly bütin dünýä boýunça kompaniýalaryň 75,9%-ine ornaşdyryldy.
Bu görkezijide lider ýurt Hindistan boldy: soragnama gatnaşyjy kompaniýalaryň 92%-i ondan peýdalanýan eken. ABŞ-da bu görkeziji 2023-nji ýylda 68% bolsa, 2024-nji ýylda 72%-e ýetdi, emma ösüş tizligi dünýäniň umumy derejesinden pes.
Işgärler geçen ýyl bilen deňeşdirilende, ChatGPT-ni ulanmaga 42,6% köp wagt sarp edýärler. Şahsy ulanyşyň görkezijisi 17%-den 28,3%-e çenli ýokarlandy.
Şol bir wagtda ABŞ-daky kompaniýalar ChatGPT-ni ornaşdyrmagy haýallatdy, muny gizlinlik syýasatlary we çäklendirmeler bilen baglanyşdyrýarlar. Apple, Amazon we Bank of America ýaly iri kompaniýalar maglumat howpsuzlygy töwekgelçilikleri sebäpli, ony iş proseslerinde çäklendirýärler. Täze kompaniýalar hem seresaply çemeleşmäge dowam edýärler.
Ulanyş işjeňligi möwsümleýin üýtgeýär: meselem, 2024-nji ýylyň ýanwar aýynda bu görkeziji 63%-e gaçdy, oktýabr aýynda bolsa 81%-e ýetdi.
Şeýle hem, Hindistan diňe bir ofisleriň ChatGPT-ni ulanmak derejesi boýunça däl, eýsem işgärleriň işjeňligi bilen hem tapawutlanýar. Bu ýurtda çalt ösýän tehnologiýalar we ýaş ilatyň orny bilen baglanyşdyrylýar.
