Meşhur Youtube-blogeri MrBeast tarapyndan dolandyrylýan Beast Industries kompaniýasy kontent önümçiligine çykdajylaryň ýokarydygy sebäpli, ýitgi çekmeli bolýar. Wideodan gelýän girdejisiniň 90%-i täze wideolary döretmäge gönükdirilýär diýip, maýa goýujylar üçin tanyşdyrylyşdan syzdyrylan maglumatlara salgylanýan The Verge ýazýar.
Esasan Feastables şokolad brendiniň önümini satýan Beast Industries söwda bölüminiň girdejisi 2024-nji ýylda kontent bilen deňleşdi. Geçen ýyl, 2023-nji ýyl bilen deňeşdirilende, arassa satuw 160%-i görkezdi, şu ýyl bolsa 100% bolar diýlip çaklanylýar.
Kompaniýa 2024-nji ýylda 500 million dollar gazandy, bu bolsa 2023-nji ýyldakydan 123% köpdür. Girdejiniň şu ýyl 900 million dollar we 2026-njy ýylda bolsa 1,6 milliard dollar bolmagyna garaşylýar.
Ösüşine garamazdan, kompaniýa girdejisiz bolmagynda galýar, soňky ýyllarda ol, takmynan, 200 million dollar ýitirdi. MrBeast (hakyky ady Jimmi Donaldson) ähli gazananlaryny täzeden maýa goýjakdygyny we bank hasabynda bir million dollardanam az pul galandygyny aýtdy. Soňky aýlarda bloger 200 million dollar toplamak üçin maýa goýujylar bilen gepleşik geçirdi. Üstünlikli bolsa, bu Beast Industries-yň bahasyny 5 milliard dollara çenli ýokarlandyrar. Geljekde MrBeast önümleriň görnüşini artdyrmak bilen, oňa içgileri, sowuk naharlary we patraklary goşmagy, şeýle hem ykjam oýunlary goýbermegi meýilleşdirýär.
