Apple kompaniýasy mmWave goldawy bolan C1 modeminiň täze wersiýasyny işläp taýýarlaýar. Bu çip maglumat geçiriş tizligini çaltlaşdyrar we enjamyň energiýa netijeliligini gowulandyrar. Şeýlelikde, kompaniýa flagman iPhone 16 modellerinde ulanylýan Qualcomm modemlerine garaşlylygyny azaltmaga ýene bir ädim ýakynlaşar.
Häzirki wagtda iPhone 16e modellerinde ulanylýan C1 wersiýasy tizligi boýunça Qualcomm-dan yza galýar we mmWave-i goldamaýar. Üpjünçilik zynjyry boýunça analitik Ming-Çi Kuo täze C1 çibiniň bu kemçilikleri düzetjekdigini, gysga aralyklarda ýokary öndürijilik berjekdigini belleýär. Bu bolsa şäher şertleri üçin örän amatlydyr.
Mundan başga-da Apple täzelenen çibiň ýük astynda durnukly bolmagyna we energiýa sarp edilişini peseltmäge aýratyn üns berýär. Bu bolsa ýuka we ýeňil enjamlarda örän möhümdir.
Täzelenen modem çykmagyna garaşylýan iPhone 17 Air modelinde ilkinji gezek ulanylyp bilner. Bu enjam, kämilleşdirilen C1 çibiniň synag meýdançasy hökmünde hyzmat eder. Mundan başga-da çibiň mobil aragatnaşykly iPad modellerinde hem peýda bolup biljekdigi aýdylýar, emma enjamlaryň sanawy häzirlikçe belli däl.
