7-nji martda Ak tamda ilkinji kriptosammit geçirildi we onda ABŞ-nyň Prezidenti Donald Tramp ele salnan aktiwlerden bitkoin ätiýaçlyklaryny döretmek meýilnamalary barada aýtdy. Ýöne maýadarlar has aýgytly ädimlere garaşypdy, bu hem kriptobazaryň kapitalizasiýasynyň peselmegine sebäp boldy.
Tramp tarapyndan gol çekilen permana görä, bitkoin ätiýaçlyklary jenaýat we raýat işlerinde ele salnan 200 müň BTC-den ybarat bolar, bu bolsa häzirki hümmet boýunça, takmynan, 17 mlrd dollara deňdir. Şeýle-de, “bitkoinden tapawutly” sanly aktiwleriň ätiýaçlygyny döretmek meýilleşdirilýär. Bu aktiwleriň satuwy diňe Maliýe ministrliginiň rugsady bilen mümkindir.
Ak tamdaky kriptosammit häkimiýetleriň we kriptopudagyň wekilleriniň gatnaşmagy bilen geçirildi. Tramp kabul edilen çäreleriň ABŞ-a “ägirt bitkoin döwletine” öwrülmäge kömek etjekdigini aýtdy we Söwda ministrligine hem Maliýe ministrligine ätiýaçlyklary býujet çykdajysy bolmazdan doldurmagyň täze usullaryny öwrenmegi tabşyrdy.
Maliýe ministri Skott Bessent Tether we Circle ýaly taslamalaryň, USDT we USDC emitentleriniň işi üçin hukuk esaslaryny döreder ýaly dollar steýblkoinleri (kriptowalýutalar) düzgünleşdirmek meýilnamalary barada aýtdy. Tramp degişli kanun taslamasyna 2025-nji ýylyň awgustyna çenli gol çekmegi meýilleşdirýär.
Maýadarlar Ak tamdan has aýgytly hereketlere garaşypdy – olaryň ABŞ-nyň hökümetiniň BTC-ni býujet serişdelerine satyn aljakdygy baradaky umytlary amala aşmady. Maýadarlaryň köpüsi şeýle tama bilen bazara goşulypdy diýip, analitikler Bloomberg bilen söhbetdeşlikde aýtdy. Şonuň üçin bazar pese gaçyş bilen jogap berdi: bir günde onuň kapitalizasiýasy 2,8%, 2,83 trln dollara çenli pese gaçdy, BTC 3,21% - 86,2 müň dollara çenli, Solana, Cardano we XRP 3-7% arzanlady.
