UFC-niň prezidenti Dana Uaýt we Saud Arabystanynyň Esasy dynç alyş edarasynyň ýolbaşçysy Turki Al aş-Şeýh täze boks promouşeniniň döredilýändigini habar berdi. Gurama ilkinji ýaryşy 2026-njy ýylda geçirmegi meýilleşdirýär diýip, ESPN habar berýär.
Taslama TKO Group Holdings (UFC-niň we WWE ligasynyň baş kompaniýasy) bilen Saud Arabystanynyň Esasy dynç alyş edarasynyň we Sela saud kompaniýasynyň uzak möhletli hyzmatdaşlygynyň miwesi boldy.
TKO dolandyryjy hyzmatdaş wezipesini öz üstüne alar we söweşleriň guralmagyna hem ösdürilmegine, şeýle-de ýaýlymlara berilmegine jogap berer. Dana Uaýt WWE-niň prezidenti we TKO-nyň müdirler geňeşiniň agzasy Nik Han bilen bilelikde guramanyň ýerine ýetiriji ýolbaşçysy bolar.
Promouşende hem başarnykly, hem öňdebaryjy söweşijiler çykyş eder. Esasy ýörelge – güýçlüleriň söweşi. Türgenler Las-Wegasdaky, Mehikodaky we Şanhaýdaky UFC Performance Institute merkezlerine elýeterlilik alar.
Al aş-Şeýh 2023-nji ýyldan bäri uly boks agşamlaryny gurnap, boksy işjeň ösdürýär. Hususan-da, ol Taýson Fýuriniň Aleksandr Usik we Dmitriý Biwolyň Artur Beterbiýew bilen söweşlerini gurady. 2024-nji ýylyň noýabrynda Turki al aş-Şeýh 10 mln dollara The Ring boks žurnalyny satyn aldy.
