Starship kosmos gämisiniň prototipiniň sekizinji synag uçuşy şowsuz tamamlandy.
Birnäçe gezek ulanmak üçin niýetlenen Super Heavy tizleşdirijisi uçuş toplumyna üstünlikli gaýdyp geldi we Mechazilla gurluşy tarapyndan tutuldy. Ýöne Starship kosmos gämisiniň özi, ähtimal, ýangyn we soňraky hereketlendirijileriň ýarylmagy sebäpli ýumruldy.
Raketa Boka-Çikadaky (Tehas ştaty) Starbeýs kosmodromyndan uçuryldy. Uçuşdan, takmynan, 10 minutdan soň Starship-iň ikinji basgançagy bilen aragatnaşyk ýitdi. 145 km belentlikde Starship pyrlanyp başlady we soňra atmosferada ýandy.
Kosmos gämisiniň döwük bölekleriniň aşak gaçyşy köp sanly wideolara düşürildi.
“Starship-iň uçuş wagty meýilnamadan daşary tiz dargama bolup geçdi we onuň bilen aragatnaşyk ýitdi. Biziň toparymyz meýilleşdirilen duýdansyz ýagdaýlara jogap beriş çärelerini amala aşyrmak üçin howpsuzlyk boýunça jogapkärli adamlar bilen dessin hereket edip başlady. Biz munuň düýp sebäbine has gowy düşünmek üçin şu günki uçuş synagyndan alnan maglumatlary gözden geçireris. Hemişekisi ýaly, üstünlik öwrenen zatlaryňdan gelýär, şu günki uçuş hem Starship-iň ygtybarlylygyny ýokarlandyrmak üçin goşmaça sapak berer” – diýip, SpaceX belledi.
Floridada kosmos gämisiniň döwük bölekleriniň aşak gaçmagy bilen baglylykda wagtlaýyn dört howa menzili ýapyldy – Maýamide, Ford-Loderdeýle, Orlandoda we Palm-Biçde.
Belläp geçsek, ýanwar aýynda Starship-iň ýedinji synag uçuşy hem şowsuz tamamlanypdy: raketanyň ikinji basgançagy orbita çykyp bilmedi we Starship uçuş wagty partlady. Şol bir wagtyň özünde Super Heavy raketa göterijisi uçuş toplumyna üstünlikli gaýdyp geldi.
