Samsung Display Barselonada (Ispaniýa) geçirilen Mobile World Congress (MWC) 2025 sergisine birnäçe innowasion OLED tehnologiýalary bilen gatnaşdy. Olaryň arasynda 500 Gs täzeleniş ýygylygy bolan QD-OLED monitor we 240 Gs OLED noutbuk paneli bar.
Iň köp üns çeken enjam – 27 dýuýmlyk 500 Gs QD-OLED monitor boldy. Bu enjam oýunçylar üçin örän çalt täzeleniş tizligini, ýokary derejeli duýgurlygy we oýunlarda baý reňkleri üpjün edýär.
Koreý metbugatyna görä, bu monitor barada 2024-nji ýylyň noýabr aýynda gürrüň edilip başlanan eken. Indi bolsa, MWC-de görkezilmeginden soň, gysga wagtda bazara çykmagyna garaşylýar.
Şeýle-de Samsung On-Cell Film (OCF) tehnologiýasyna esaslanýan OLED panellerini hem hödürledi. Bu tehnologiýa displeýlerdäki polýarizator hökmanylygyny aradan aýyrýar, ýagtylygy 1,5 esse artdyrýar, energiýanyň sarp edilişini peseldýär we ekranlary 20% inçeldýär. Netijede, OCF panelleri öňki nesiller bilen deňeşdirilende, bary-ýogy 63% energiýa ulanýar we ekranyň 10%-de 5000 kd/m² derejede ýokary ýagtylyk berýär.
Bu tehnologiýa öň Galaxy Z Fold 3-de ulanylypdy. Indi bolsa, Samsung ony smartfonlara, akylly sagatlara we noutbuklara giňden ornaşdyrmagy meýilleşdirýär.
