Apple 11 we 13 dýuýmlyk ekrany bolan täzelenen iPad Air planşetleriniň täze görnüşlerini tanyşdyrdy.
Täze modeller 8 prosessor ýadrosy, 9 grafiki ýadrosy we 16 ýadrosy bolan NPU bilen enjamlaşdyrylan Apple M3 çipsetini aldy. Bu çip öňki M2 modeliniň ornuny tutýar we 2022-nji ýylyň modellerinde ulanylan M1 çipinden iki esse güýçlüdir.
Emma çipden galan beýleki tehniki häsiýetler üýtgemedi. Operatiw ýat 8 GB, kameralar bolsa 12 MP bolup galdy. Ekranyň täzeleniş ýygylygy öňküsi ýaly 60 Gs, şeýle hem USB Type-C porty, Wi-Fi 6E we Bluetooth 5.3 goldawyny saklap galdy. Şonuň ýaly-da güýç düwmesinip içine ornaşdyrylan Touch ID hem bar.
Täze modelleriň reňk görnüşleri hem öňküsi ýaly galdy: Space Gray, Purple, Blue we Starlight. Mundan başga-da ulanyjylar uly trekpadly täzelenen Magic Keyboard klawiaturasyny satyn alyp bilerler.
11 dýuýmlyk iPad Air (2025) diňe Wi-Fi we 128 GB içerki ýat bilen 599 dollar bahadan, LTE görnüşi bolsa 749 dollardan hödürlenýär.
13 dýuýmlyk iPad Air (2025) modeli Wi-Fi we 128 GB içerki 799 dollar bahadan, LTE görnüşi bolsa 949 dollardan elýeter bolar.
Täzelenen Magic Keyboard klawiaturasynyň bahasy 11 dýuýmlyk iPad Air üçin 269 dollar, 13 dýuýmlyk iPad Air üçin bolsa 319 dollar bolar.
Şeýle hem kompaniýa iki ýyldan gowrak wagtdan soň ilkinji gezek täze esasy iPad modelini çykardy.
Air modellerinden tapawutlylykda, 11-nji nesil esasy iPad Apple Intelligence bilen gelmeýär, ýöne öňki modelden has arzan. Täze model täzelenen A16 çipi esasynda gurlup, «iki esse köp başlangyç içerki ýady» – 128 GB hödürleýär.
Model dürli reňklerde elýeterli bolar, şol sanda gök, gülgüne, sary we kümüş reňklerde. Planşetiň başlangyç bahasy 349 dollar.
Öňünden sargyt etmek mümkin. Planşetler şu ýylyň 12-nji martynda satuwa çykar.
