TCL kompaniýasy premium telewizor satuwy boýunça taryhda ilkinji gezek ikinji orna çykyp, LG-ni yzda galdyrdy. Counterpoint Research-iň maglumatlaryna görä, hytaýly Hisense we TCL brendleri bazardaky paýlaryny işjeň artdyryp, düýbi Günorta Koreýada ýerleşýän tehnologiýa ägirtleri LG we Samsung-yň ornuny peseldýär.
2022-nji ýylda TCL eýýäm umumy telewizor iberilişi boýunça LG-ni geçipdi. 2024-nji ýylyň soňky çärýeginde Samsung liderligini saklap galdy, TCL bolsa ikinji orny berkitdi, şol bir wagtyň özünde LG dördünji orna düşdi.
2024-nji ýylyň dördünji çärýeginde global telewizor bazary bary-ýogy 2% ösdi, ýöne premium modelleriň satuwy artdy. Munuň sebäbi bolsa, ösen tehnologiýalary modellere bolan islegiň ýokarlanmagydyr.
«QD-MiniLED, QD-LCD, NanoCell, LCD 8K, QD-OLED, WOLED we MicroLED ýaly premium modelleriň iberilişi geçen ýylyň şol döwri bilen deňeşdirilende 51% ösdi we taryhy taýdan iň ýokary derejesine ýetdi. Umuman, 2024-nji ýylda premium telewizorlaryň iberilişi 38% ýokarlandy» — diýip, Counterpoint Research belleýär.
Samsung-yň bu pudakdaky paýy 12% azaldy we 29% boldy, TCL bolsa premium modelleriň iberilişini iki esse artdyrdy.
Şeýle-de bolsa, «premium telewizor» düşünjesiniň entek anyk kesgitlenmeýändigini bellemek gerek. Sebäbi orta derejeli modelleriň käbiri-de premium hökmünde öňe sürülýär. Şonda-da MiniLED telewizorlaryna bolan isleg ýokarlanmaga dowam edýär we olaryň satuwy ýyllyk hasaplama boýunça 170% artdy.
Şeýle-de Samsung-yň telewizor önümçiliginde dünýä boýunça iň uly öndüriji bolmagynda galýandygyny we bu derejesini 19 ýyl bäri saklap gelýändigini bellemek möhümdir. Gymmat bahaly telewizor bazarynda (2500 dollardan ýokary) Samsung 49,6% bazar paýyna eýe, 75 dýuýmdan uly ekranly telewizor pudagynda bolsa 28,7%-lik paýy saklaýar.
