Saud Arabystany Gyzyl deňziň kenarýakasynda gurulýan «Oksagon» atly ýüzýän port şäheriniň taslamasyna uly üýtgeşmeleri girizdi. Bu şäher indi diňe bir möhüm ulag merkezi bolman, eýsem senagat we maglumat tehnologiýalarynyň öňdebaryjy merkezi hökmünde hem çykyş eder diýip, New Atlas neşiri habar berýär.
Oksagon her ýyl 12 million TEU-a çenli konteýner ýüklemegi we düşürmegi başarar, bu köp sanly iri portlaryň umumy ýük dolanyşygyndan ep-esli ýokarydyr. Bu maksada ýetmek üçin, kenara ýakyn kanallar 550 metr giňeldilip, 19 metr çuňlaşdyrylar.
Logistika işlerini has netijeli gurnamak üçin, emeli aň bilen dolandyrylýan awtomatlaşdyrylan ulgamlardan we özbaşdak işleýän ulaglardan peýdalanylar. Mundan başga-da gämi duralgasynda demir ýol ulgamy hem gurlar.
Şeýle-de şäher Gün we ýel energiýasy bilen işleýän stansiýalaryň kömegi bilen, arassa energiýa öndürýän merkeze öwrüler hem-de uly göwrümli maglumat işleýiş merkezini öz içine alar.
