Amerikanyň banky we dünýäniň iň iri konglomeratlaryndan biri bolan Citigroup ýalňyşlyk bilen müşderisiniň hasabyna 280 dollaryň ýerine 81 trillion dollar geçirdi. Bu waka 2024-nji ýylyň aprelinde bolan hem bolsa, ony köpçülige indi aýan etdiler diýip, Financial Times gazeti habar berýär.
Ýalňyşlyk maglumatlar bankyň ätiýaçlyk ulgamyna el bilen girizilende goýberildi. Puluň möçberi ýazylýan ýerde aslynda nollar durdy we işgär olary pozmandyr. Ýalňyşlygy duýman, ikinji işgär hem pul geçirmesini tassyklapdyr. Diňe üçünji wezipeli adam 1,5 sagat soň geleşigi gaýtadan işlände şübheli tölege üns berýär. Birnäçe sagatdan soň töleg ýatyrylýar.
Citigroup bolan waka barada Federal ätiýaçlyk goruna we Pul dolanyşygyna gözegçilik müdirligine habar berdi. Bankda içerki iş tertibiniň aslynda-da serişdäniň hasapdan çykmagyna ýol bermejekdigini nygtadylar.
Bu waka banka-da, müşderä-de hiç hili täsir ýetirmedi diýip, maliýe konglomeratynda aýtdylar. Olar: "Bu bolan waka mydama elde işlemekden saklanmaga jan çekýändigimizi we dolandyryşlary awtomatlaşdyrmak ugrunda tagalla edýändigimizi görkezýär" - diýip, sözüniň üstüni ýetirdiler.
FT-niň çeşmeleri hem öz gezeginde bolup geçen wakanyň “giriş ýalňyşlygy we ulanyjy interfeýsli ätiýaçlyk ulgamy bilen baglanyşyklydygyny” tassyklaýar. FT-nyň berýän maglumatlaryna görä, geçen ýyl Citigroup-de 1 milliard dollardan gowrak ýalňyş geçirimleriň 10-syny, 2023-nji ýylda 13 ýagdaýy hasaba aldy.
