Hytaýyň Qixing RV kompaniýasy adaty bolmadyk Type T (FT 3124-Y) ulag-jaýyny hödürledi. Model Ford T8-e esaslanyp gurlupdyr. Onuň esasy aýratynlygy ýygnalýan üçeginiň bolmagydyr. Şonuň esasynda eýwanly we hatda basseýnli ikinji gat döreýär.
Ulag-jaýyň uzynlygy takmynan 6 metr, dizel hereketlendirijisi, awtomatiki geçiriji bilen enjamlaşdyrylan we tizligi sagatda 156 km-e ýetip bilýär. Ýangyç sarp edişi - 11 l / 100 km. Içine 6 adam ýerleşýär.
Ulag-jaýyň ýüksüz agramy 4750 kg, ýükli - 5250 kg. Öň tarapky podweskasy - MakFerson, yzkysy - Leafspring. Ähli tigirleri disk tormozy bilen enjamlaşdyrylan. Sürüjiniň we ýolagçylaryň howpsuzlygy ABS, EBD, ESC we howa ýassygy ýaly häzirki zaman ulgamlary bilen üpjün edilýär.
Kuzowy ýeňil, berk we ýylylyga çydamly materiallardan ýasalypdyr. Ýokarky galýan üçegi, hatda uzyn boýly adamlar üçinem amatly giňişlik döredýär. Içinde gündelik durmuş üçin ähli zerur zatlar bar: DAIKIN kondisioneri, ýyladyş, nawigasiýa ulgamy, 3000 Wt kuwwatly inwertor, Gün paneli we ş.m. Daş-töwerek görnüp duran giň terrasasynda arassa howadan we howuzdan lezzet alyp bolýar.
Type T-niň bahasy 103 müň dollardan 158 müň dollar aralygynda.
