Xiaomi kompaniýasy täze flagman nauşniklerini – Buds 5 Pro modelini tanyşdyrdy. Bu enjam kompaniýanyň Wi-Fi arkaly ses bermegi goldaýan ilkinji simsiz nauşnigi bolup, ol 4,2 Mbit/s-e çenli ýokary maglumat geçirijilik tizligini üpjün edýär. Şeýle-de täze model aptX Lossless tehnologiýasyny (2,1 Mbit/s-e çenli) goldaýar.
Buds 5 Pro sesiň gönümel başga dile terjime edilmegi ýa-da tekste öwrülmegi ýaly emeli aň funksiýalaryny hem goldaýar.
Täze nauşnik goşa güýçlendiriji ulgam we üç draýwer bilen üpjün edilen: 11 mm titan wufer (ýokary hilli bass üçin), 10 mm keramiki twiter (has arassa we inçe ses üçin). Olaryň sazlamalary Harman Golden Ear inženerler topary tarapyndan sazlandy. Şeýle-de Master Harman ekwalaýzeri dört sany öňünden düzülen ses profilini hödürleýär.
Aktiw ses basyş ulgamy (ANC) sesiň derejesini 55 dBA çenli peseldýär. Üç sany mikrofon bolsa 15 m/sag-e çenli öwüsýän güýçli şemalyň sesini, şeýle-de jaňda gürleşilýän mahaly 100 dBA çenli daşky sesleri blokirlemegi başarýar.
Buds 5 Pro Bluetooth 5.4 arkaly işleýär hem-de IP54 gorag standartyna laýyklykda, tozana we çyglylyga garşy durnukly. Batareýasynyň ömri: Wi-Fi režiminde – 10 sagada çenli, Bluetooth arkaly – 8 sagada çenli, zarýad gutusy bilen umumy iş wagty bolsa – 40 sagada çenli.
Xiaomi Buds 5 Pro şu reňklerde hödürlenýär: «Snow Mountain White» (ak), «Titanium Gold» (altynsöw) we «Mirage Black» (gara, diňe Wi-Fi wersiýasy üçin).
Bahalary:
- Wi-Fi wersiýasy – 1499 ýuan (206 dollar);
- Bluetooth wersiýasy – 1299 ýuan (178 dollar).
Täze Xiaomi Buds 5 Pro nauşnikleri Hytaýda satuwa çykaryldy.
