Techart ussahanasy düýpli kämilleşdirilen Porsche Cayenne-i tanyşdyrdy. Güýçlendirilen wersiýa Techart Magnum diýlip atlandyryldy. Awtoulagyň dizaýny ep-esli üýtgedildi, şeýle-de onuň V8 hereketlendirijisi güýçlendirilip, 930 at güýjüne çenli ýokarlandyryldy.
Krossoweriň kuzowy uglerod süýümi bilen örtüldi. Karbondan ägirt uly howa alýan öňki bamperi, kapoty we giňeldilen teker arkalary ýasaldy. Awtoulagyň yzky bölegi üçin täze bamperler, diffuzor we turba ulgamy boýunça birnäçe wariantlar hödürlenýär. Adaty görnüşde dört sany turba ýerleşdirilýär, Sport görnüşinde bolsa iki sany merkezi turba ulanylýar.
Techart ussahanasy Turbo GT wersiýasynyň V8 hereketlendirijisiniň güýjüni 659-dan 930 at güýjüne, öwrüminiň pursadyny (torkuny) bolsa 1100 Nm-e çenli ýokarlandyrdy.
Magnum 100 km/s tizlige bary-ýogy 2,7 sekuntda ýetýär, iň ýokary tizligi bolsa 330 km/s-e barabar.
Geljekde Porsche Cayenne elektrikli awtoulag bolar, ýöne şonda-da benzinli hereketlendirijili görnüşi nobatdaky döwrebaplaşdyryşdan soň hem bazarda galmaga dowam eder.
