Xiaomi kompaniýasy flagman smartfony bolan Xiaomi 15 Ultra-nyň, şeýle hem 1500 at güýçli SU7 Ultra elektromobiliniň tanyşdyryljak senesini resmi taýdan tassyklady. Çäre 2025-nji ýylyň 27-nji fewralynda geçiriler.
Kompaniýanyň baş direktory Leý Szýun bu önümleriň kompaniýanyň innowasiýalarynyň 15 ýyllyk geçen ýolunda ýeten çür depesini alamatlandyrjakdygyny nygtady.
Xiaomi 15 Ultra 50 Mp esasy kamera, 50 Mp aşa giň burçly modula we 200 Mp periskopiki teleobýektiwe eýe bolar. Şeýle hem smartfon 2K ekran, Snapdragon 8 Elite SoC prosessory we çalt zarýad almak mümkinçiligi bolan 6000 mAs batareý bilen enjamlaşdyrylar.
SU7 Ultranyň hut şol gün tanyşdyrylmagy - bu modeliň satuwynyň başlanmagyny alamatlandyrýar diýip, CnEVPost ýazýar. Bu superkar 1548 at güýjüne eýe bolup, sagatda 100 km tizlige iki sekunda ýetmän galýar. Maksimal tizligi - sagatda 350 km. Kompaniýa eýýämden 4000 töweregi deslapky sargyt aldy we şu ýylyň özünde 10 müň maşyn satmagy meýilleşdirýär.
Ýatlatsak, ýakynda SU7 Ultra Nýurburgring ýolunda iň çalt dört gapyly, tapgyrlaýyn çykaryljak ulag hökmünde rekord goýupdy. Bu elektrikli ulag şeýle hem Şanhaý halkara awtodromynda Porsche Taycan Turbo GT-niň rekordyny döwdi.
Smartfon bilen ulagyň tanyşdyrylyş dabarasy 27-nji fewralda Aşgabat wagty bilen 16:00-da başlanar. Täze önümleriň ikisiniň hem dünýä boýunça tanyşdyrylyşy Barselonada MWC 2025 sergisiniň öň ýanynda - 2-nji martda geçiriler.
