Apple-iň (PRODUCT) RED önüm hatarynyň kompaniýanyň taryhynyň bir bölegine öwrülendigine garamazdan, häzir satuwdan kompaniýanyň (RED) haýyr-sahawat guramasyny goldamak üçin haýyr-sahawat başlangyçlaryny alamatlandyrýan gyzyl reňkli gajetler aýryldy. Bu barada MacRumors habar berýär.
2006-njy ýyldan bäri Apple Afrikada AIW we AIDS, inçekesel we gyzzyrma ýaly keseller bilen göreşýän The Global Fund haýyr-sahawat gaznasy üçin serişde ýygnamak boýunça (RED) guramasy bilen hyzmatdaşlyk edýär. Bu hyzmatdaşlygyň çäklerinde kompaniýa käbir önümlerini (PRODUCT) RED aýratynlygy bilen gyzyl reňkde çykarýar. Soňra bu önümleriň satuwyndan alnan serişdeleriň bir bölegi haýyr-sahawata gönükdirilýär. Tehnologiýa ugrunda hünärmen Jon Smitiň aýtmagyna görä, soňky ýyllarda “bu reňkiň elýeterliligi yzygiderli azaldy”.
iPhone SE, iPhone 14 we iPhone 14 Plus smartfonlarynyň önümçiligi bes edilenden soň bolsa, (PRODUCT) RED brendiniň gurluşlary indi satylmaýar. Häzirki wagtda bu hatarda ýeke-täk elýeterli harytlar köne iPhone modelleri üçin birnäçe daşlyklar bolup galdy.
Indi Apple gyzyl reňklerde elýeterli bolan täze Beats önümleri üçin başga belligi ulanyp başlady. Şeýle üýtgeşme adaty (PRODUCT) RED strategiýasyndan daşlaşylmagyny görkezýär we bu “Apple-iň öz önümlerini tapawutlandyrmak islegi ýa-da (RED) bilen hyzmatdaşlyk şertleriniň üýtgemegi bilen baglanyşykly hem bolup biler”.
(PRODUCT) RED-iň geçmişe gidýändigine garamazdan, kompaniýa The Global Fund gaznasyny Apple Pay-de ýyllyk haýyr-yhsan programmasy arkaly goldamagyny dowam etdirýär. Ol soňky gezek 2024-nji ýylyň 29-njy noýabryndan 8-nji dekabry aralygynda geçdi. Kompaniýanyň geljekde hyzmatdaşlygy gaýtadan dikeltmegi-de mümkin, ýöne häzirlikçe Apple-iň gyzyl gajetleriniň eýýamy soňlanýar.
