Ilon Mask fotorealistik grafikaly oýunlary işläp düzmek üçin emeli aňdan peýdalanjak xAI Gaming studiýasynyň işe girizilýändigini mälim etdi diýip, Tom’s Hardware habar berýär.
“Biz xAI-de oýun EA studiýasyny işe girizýäris. Eger siz EA oýunlaryny döretmekde hyzmatdaşlyga gyzyklanma bildirýän bolsaňyz, baş üstüne, xAI-e goşulyň” – diýip, Mask Grok-3 modelini işe girizmäge bagyşlanan göni ýaýlymda aýtdy. Ol häzirlikçe başga maglumat bermedi.
Grok-3 modeli eýýäm Python programmirleme dilinde Tetris we Bubble Trouble-yň esasy wersiýasy bilen meňzeş ýönekeý 2D oýunlaryny döretmek başarnygyny görkezdi. Ýöne model çylşyrymly ses effektlerini bermekde kynçylyk çekýär.
Mask Grok-3-üň oýunlarda grafika durulygyny ýokarlandyryp biljekdigini belledi, ýöne onuň beýleki studiýalar tarapyndan döredilen taslamalar üçin ulanyljakdygy ýa-da ýokdugy belli däl. Milliarderiň aýtmagyna görä, xAI öz öňünde doly derejeli oýun taslamalaryny işläp taýýarlamak ýaly has uly maksatlary goýýar. Şeýle-de, Ilon Mask Colossus superkompýuterini million GPU çenli giňeltmegi meýilleşdirýär, bu bolsa täze, has ösen EA modellerini işläp taýýarlamagy çaltlaşdyryp biler.
