Hytaýyň GalaxySpace kompaniýasy ilkinji gezek ykjam telefonlar bilen pes orbitadaky hemralaryň arasynda göni aragatnaşyk tehnologiýasyny görkezdi. Bu giň zolakly aragatnaşyk hemralarynyň synag topary arkaly mümkin boldy.
Görkeziş Pekinde geçirilen täjirçilik kosmos konferensiýasy wagtynda boldy. Hemra forumyň geçýän ýerinden uçdy we gatnaşyjylar üçekdäki terminal gurluş arkaly öz telefonlaryny hemra birikdirdi. Aragatnaşyk Pekindäki şlýuz stansiýasy arkaly üpjün edildi we Pekinde-de, Tailandda-da işledi.
GalaxySpace-iň wise-prezidenti Lýu Çan Tailandyň iň uly telekom-operatory True Corporation bilen ýaňy-ýakynda gazanylan ylalaşygy belledi. Bu hyzmatdaşlyk hemra aragatnaşygyny, şeýle-de ykjam gurluşlar bilen hemralaryň arasynda aragatnaşyk tehnologiýalaryny ösdürer.
2018-nji ýylda döredilen GalaxySpace Hytaýda hemra öndürijisi bolup, hemra interneti üçin öňdebaryjy çözgütler bilen üpjün edýär.
Konferensiýada bu ugurda täze tehnologiýalary ösdürmek üçin hemra internetiniň senagat parkynyň işe girizilendigi yglan edildi. Senagat parky hemra interneti boýunça işläp taýýarlamalary ilerletmek üçin Pekiniň E-Town aerokosmos senagatynyň tejribesini we tehnologiýa pudaklaryny ulanar. Sekiz sany esasy barlaghana aerokosmos enjamlaryny taslamak, hemra internet programmalary, aragatnaşyk we hemralary dolandyrmak ýaly ugurlara ünsi jemlär.
E-Town-da 160-dan gowrak aerokosmos kärhanasy, şol sanda 70-den gowrak milli ýokary tehnologiýa kompaniýasy bar.
