“Mançester Ýunaýted” futbol klubunyň eýesi Manchester United 2025-nji maliýe ýylynyň ikinji çärýegini girdejiniň 12% azalmagy bilen arassa ýitgide tamamlady.
Kompaniýanyň metbugat relizinde habar berlişi ýaly, oktýabr-dekabr aýlarynda arassa ýitgi geçen ýylyň degişli döwründäki 20,4 mln funt düşewünt bilen deňeşdirilende 27,7 mln funt sterling ($34,9 mln) boldy. Düzedilen EBITDA 22,9% pese gaçyp, 70,5 mln funt boldy.
Girdeji bir ýyl ozalky 225,8 mln funt bilen deňeşdirilende, 198,7 mln funta ($250,66 mln) çenli azaldy.
MÝ-niň oýunlary görkezmek hukugyny satmakdan gazanan girdejisi 42,1% (61,6 mln funta / $77,71 mln çenli) pese gaçdy, emma petek satuwyndan gazanan girdejisi 9,2% (52 mln funta / $65,60 mln çenli) ýokarlandy.
Täjirçilik işinden gelen girdeji 18,5% (85,1 mln funta / $107,36 mln çenli) ýokarlandy. Muňa, esasan, MÝ-niň Snapdragon çipleriniň mahabatyny ýerleşdirmek üçin amerikan Qualcomm Inc. kompaniýasy bilen baglaşan hemaýatkärlik şertnamasy ýardam etdi.
Häzirki maliýe ýylynda kompaniýa 650-670 mln funt ($820-845 mln) möçberde girdeji gazanjakdygyny çaklaýar. Manchester United kompaniýasynyň paýnamalarynyň bahasy çarşenbe güni Nýu-Ýork söwdasynda 0,8% peseldi.
