18-nji fewralda Kuala-Lumpurda Huawei Consumer Business 2025 çäresi geçirildi we onda hytaý kompaniýasy dört sany täze gurluşyny hödürledi: üç eplenýän smartfon, planşet, nauşnik we fitnes-bilezik.
Tanyşdyrylyş dabarasynyň esasy wakasy Huawei Mate XT Ultimate – dünýäde ilkinji üç eplenýän smartfon boldy. Bu smartfonyň geçen ýyl hytaý bazarynda çykmagy tehnologiýa dünýäsiniň iň esasy täzelikleriniň biri bolupdy.
Smartfon 10,2 dýuým diagonally ekrana eýe boldy hem-de çeýe aýna we hereket mehanizmi bilen üpjün edildi. Bu mehanizm we onuň esasy komponentleri örän berk polatdan ýasaldy. Açylan görnüşde smartfonyň galyňlygy 3,6 mm, ýapyk görnüşde 12,8 mm barabar.
Ýogynlygy bary-ýogy 1,9 mm bolan dünýäde iň inçe kremniý batareýasynyň sygymy 5600 mA/sag barabar. Ol 66 Wt çalt we 50 Wt simsiz zarýad berşi goldaýar. Arka tarapynda kameraly blok ýerleşdirildi: 50 Mp esasy, 12 Mp ultra giňburçly we 12 Mp periskopik kamera. Frontal kamera – 8 Mp.
Ýewropada gajet 3499 ýewro baha bilen satylýar.
Huawei-niň Malaýziýada hödürlenen galan üç gurluşy barada TmCars aýratyn habarda maglumat berer.
