Samsung dünýäniň iň iri telewizor öndürijisi bolmagyny dowam etdirýär. Omdia analitik kompaniýasynyň berýän maglumatlaryna görä, 2024-nji ýylda dünýäde satylan telewizorlaryň 28,3%-i Samsung-a degişli bolupdyr. Şeýlelikde, kompaniýa 19 ýyl bäri bazardaky öňdeligini elden bermän gelýär.
Günorta Koreýanyň tehnoägirdi bu üstünligini innowasion tehnologiýalaryny yzygiderli kämilleşdirmek arkaly gazanýar. Hususan-da emeli aň (EA) bilen enjamlaşdyrylan telewizorlaryň öndürilmegi kompaniýanyň bazardaky ornuny has-da berkidýär. Mundan başga-da Samsung ýokary derejeli (premium) telewizorlaryň hem-de örän uly ekranly modelleriň önümçiligine aýratyn üns berýär.
Gymmat bahaly (2500 dollardan ýokary) telewizorlar pudagynda Samsung-yň bazardaky paýy 49,6%-e deň. Örän uly ekranly, ýagny 75 dýuýmdan uly telewizorlaryň bazarynda bolsa kompaniýanyň paýy 28,7%-e ýetýär.
2024-nji ýylda kompaniýa 8,34 million sany QLED telewizor satdy. Şeýlelikde Samsung bu pudagyň 46,8%-ini eýelemegi başardy. Şeýlelikde, geçen ýyl satylan ähli telewizorlaryň 10%-i QLED tehnologiýasy bilen işleýän modeller boldy.
Şeýle hem Samsung 1,44 million sany OLED telewizor satdy. Bu bolsa kompaniýanyň degişli bazardaky paýyny 27,3%-e ýetirýär. 2023-nji ýyl bilen deňeşdirilende bu görkeziji 42% köpelipdir.
