Google Chrome-yň işläp düzüjiler topary brauzere Enhanced Protection emeli aň funksiýasyny goşdy. Bu funksiýa ulanyjylaryň howply saýtlardan, ýüklemelerden we giňeltmelerden goragyny üpjün edýär. Safe Browsing ulgamynyň bir bölegi bolan bu funskiýa Canary kanalynda üç aý synag edilenden soň ähli platformalarda elýeterli boldy. Ýöne ol işjeň ulanylan ýagdaýynda, girilýän saýtlar baradaky maglumatlar Google-a iberilýär.
Öň bu funksiýa Proactive Protection diýlip atlandyrylýardy, ýöne onuň täze ady brauzeriň howpsuzlyk ulgamyna emeli aňyň girizilendigini görkezýär. Häzirki wagtda EA-ly täze funksiýanyň EA bolmadyk öňki funksiýadan nähili tapawutlanýandygy belli däl. Ýöne Google-yň howply bolup biljek saýtlar barada öňünden duýdurmak üçin maşyn biliminiň algoritmlerini ulanýan bolmagy mümkin.
Kompaniýanyň beýanyna görä, häzirkizaman EA algoritmleri bilen üpjün edilen gorag ulgamy ýüklenýän faýllaryň çuňňur skanirlemesini geçirip, şübheli ýüklemeleri çalt ýüze çykarmaga mümkinçilik berýär, şeýle-de brauzeriň howpsuzlyk ulgamynyň takyklygyny we netijeliligini ýokarlandyrýar. EA bilen güýçlendirilen gorag ilkibaşda öçük bolup, ulanyjylar ony işjeňleşdirip biler: Windows, Android we iOS-da Google Chrome-yň “Setting ® Privacy and security ® Security” bölümine geçmeli.
