Apple kompaniýasy şu ýylyň güýzünde täze nesil Apple M5 çibi bilen MacBook Pro noutbugyny hödürlär, 2026-njy ýylyň birinji ýarymynda bolsa bu prosessor täzelenen iPad Pro planşetlerinde peýda bolar diýip, Bloomberg-iň žurnalisti Mark Gurman habar berýär.
Ýatlap geçsek, Apple ilkinji gezek özüniň Apple M4 çibini 2024-nji ýylyň maý aýynda täzelenen iPad Pro-da hödürläpdi, soňra ol oktýabrda MacBook Pro-da peýda boldy. Ýöne bu gezek Apple tertibi üýtgetmek kararyna gelen bolsa gerek.
Gurmanyň aýtmagyna görä, täze M5 çipli MacBook Pro çykmazdan ozal, kompaniýa häzirki nesil M4 prosessory bilen täzelenen Mac Studio we Mac Pro kompýuterlerini çykarar. Täze gurluşlar iýun aýynda Apple-iň Bütindünýä işläp düzüjileriň konferensiýasynda (WWDC) görkezilip bilner.
M5 çipleriniň kämilleşdirilen ARM arhitekturasyny almagyna we TSMC-niň 3-nm tehnologiki prosesi arkaly öndürilmegine garaşylýar. Apple-iň M5 çibi üçin TSMC-niň has ösen 2-nm tehprosesini ulanmakdan ýüz öwürmegi çykdajylar bilen baglanyşyklydyr. Şol bir wagtyň özünde, M5-iň ýokary öndürijilikli wersiýalary M4 bilen deňeşdirilende, aýratynam, TSMC-niň System on Integrated Chip (SoIC) tehnologiýasynyň ulanylmagynyň hasabyna uly kämilleşmelere eýe bolar.
